ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានចូលរួមជាមួយពលរដ្ឋអបអរចំពោះលទ្ធផលដែលកម្ពុជាពុំមានករណីឆ្លងជំងឺកូវីដ-១៩ សូម្បីតែមួយករណីនៅក្នុងរយៈពេលបីថ្ងៃចុងក្រោយនេះ។ សម្ដេចបានចាត់ទុកភាពជោគជ័យនេះបានមកពីការចូលរួមរបស់ប្រជាពលរដ្ឋ មន្ត្រីរាជការ បុគ្គលិកសុខាភិបាលក្នុងការប្រយុទ្ធនឹងជំងឺ។
ក្នុងសារពិសេសមុនឡើងយន្តហោះចេញដំណើរទៅកាន់សហរដ្ឋអាមេរិកដើម្បីចូលរួមធ្វើជាសហប្រធាននៃកិច្ចប្រជុំកំពូលអាស៊ាន-អាមេរិកនៅ សម្ដេចតេជោបានលើកឡើងថា ថ្វីដ្បិតតែសម្ដេចមានអារម្មណ៍ថា ការចេញដំណើរទៅអាមេរិកលើកនេះសម្ដេចមានអារម្មណ៍ថា ហាក់បីដូចជាមិនទាន់បានបំពេញកាតព្វកិច្ចធ្វើជាប្អូនប្រុសចំពោះមរណភាពរបស់សម្ដេចទេពញាណ ហ៊ុន ណេង ដែលមិនទាន់បានធ្វើបុណ្យគម្រប់ ៧ថ្ងៃ។ តែនេះគឺជាភារកិច្ចជូនជាតិដែលសម្ដេចត្រូវបំពេញដែលខានមិនបាន។
ទោះជាយ៉ាងណាមុននឹងចេញដំណើរ សម្តេចតេជោ បានផ្ញើសារសួរសុខទុក្ខដល់ប្រជាពលរដ្ឋនិងបានបង្ហាញការសប្បាយចិត្តផងដែរចំពោះលទ្ធផលដែលកម្ពុជារកមិនឃើញការឆ្លងថ្មីជំងឺកូវីដ-១៩ នៅក្នុងរយៈពេល ៣ថ្ងៃចុងក្រោយជាប់គ្នានេះ។
ទោះជាយ៉ាងណាសម្ដេចបានជំរុញដល់ពលរដ្ឋចូលរួមបន្តទៀតក្នុងការប្រយុទ្ធប្រឆាំងទៅនឹងជំងឺកូវីដ-១៩ ធ្វើយ៉ាងណាកុំឲ្យជំងឺនេះត្រឡប់មកកាន់កម្ពុជាសារជាថ្មី។
សម្ដេចបានចាត់ទុកលទ្ធផលនៅពេលនេះគឺបានមកពីភាពជោគជ័យនៃយុទ្ធនាការវ៉ាក់សាំងទូទាំងប្រទេស។
គិតត្រឹមថ្ងៃច័ន្ទ ទី៩ ខែឧសភា កម្ពុជារកមិនឃើញករណីឆ្លងមេរោគកូវីដ-១៩ ថ្មីបន្ថែមនោះទេ។ កម្ពុជាបានរកឃើញករណីឆ្លងសរុបចំនួន ១៣៦ ២៦២នាក់ ស្លាប់ដោយសារកូវីដ-១៩ សរុបចំនួន ៣ ០៥៦នាក់ ព្យាបាលជាសះស្បើយបានសរុបចំនួន ១៣៣ ១៨១នាក់ សរុបករណីនាំចូលពីក្រៅប្រទេស ២១ ២១៩ករណី និងឆ្លងសរុបក្នុងសហគមន៍ ១៤,៤៥៩ករណី (ជាប្រភេទអូមីក្រុង)៕
